Iyi mbumbanyigisho yibanda ku buhanga bwo kugereranya indimi no kwerekana inkomoko yazo. By’umwihariko, yibanda ku rurimi rw’Ikinyarwanda, ikarugereranya n’izindi ndimi Bantu, ikerekana inkomoko yacyo, ikerekana isano n’itandukaniro biri hagati yacyo n’izindi ndimi Bantu. Byongeye, yerekana umwanya w’Ikinyarwanda mu ruhando rw’izindi ndimi Bantu n’izindi ndimi nyafurika. Iyi mbumbanyigisho kandi yerekana amahame, amahange n’uburyo bikoreshwa mu kugereranya indimi no gusesengura inkomoko yazo, imikurire yazo, ndetse kugeza no ku mizimirire yazo, haba mu bijyanye n’imvugo n’amajwi, ibijyanye n’iyigantego, ibijyanye n’iyiganteruro, ndetse n’ibijyanye n’iyiganyito mu ndimi. Ikindi kandi, iyi mbumbanyigisho yerekana uruhare rw’abenerurimi, inkomoko, imico, amateka, iterambere, ubuzima n’imibereho byabo, mu mihindagurikire y’indimi. Nyuma, iyi mbumbanyigisho yerekana amahame, amahange n’uburyo bukoreshwa mu kugaragaza inkomoko y’indimi no kwerekana uko ururimi rw’inkomoko rushobora kuba rwari ruteye.
- Lecturer: Rukundo Desire
- Lecturer: Alphonse NTEZIYAREMYE